أكيلة البلد فضلوا فترة مش لاقيين حد يحتوي الكرش المصري بشوية أكل بلدي محترمين بأسعار معقولة، خصوصاً بعد ما البرنس قفل. لغاية ما بدأ يظهر علي ساحة الأكل صبحي كابر، أو زي ما بنحب نسميه "شارع الأكل". لو عمرك ما رُحت (أو رُحت قبل كده) لصبحي كابر، دي ٥ قواعد لازم تبقي عارفها قبل ما تروح :
١- أيام الخميس والجمعة والسبت المكان بيبقي أزحم من سينمات وسط البلد في الأعياد...بالمعني الحرفي.
روح في نص الأسبوع، ويا تروح بدري يا تروح بليل خالص. في الويك إند المكان بيبقي أشبه بفرح شعبي، بس بدل المخدرات أكل.
٢- المشوار أمتع بكتير لو هتروحه بمواصلات. إركب مترو وإنزل محطة روض الفرج، ومن هناك إركب أي توكتوك هيوصلك لغاية الترابيزة وآخره هياخد ١٠ جنيه لو شايفك سائح.
٣- مينفعش تروح صبحي ومتاكلش ورقة لحمة ولحمة مقلية باللية وفراخ شيش وريش وملوخية ورز بالشعرية وورقة سجق وكبدة باللية..شوف، هات المنيو كله.
٤- الطلبات مبتنزلش كلها مرة واحدة، ممكن يحصل إنك تكون خلاص شبعت والملوخية لسه منزلتش..ساعتها لازم تتصرف وتجوّع نفسك بأي طريقة. قوم إلعب ٥٠ نطة حبل هتحرق اللي أكلته بعد كده خش ع الملوخية..الملوخية تستاهل نط الحبل عشانها.
٥- متوسط الفرد هناك ٧٠ جنيه وهتقوم علي ضوافرك من كُتر الأكل وبعد الأكل هتلعن اليوم اللي طبقت فيه قاعدة رقم "٢" وهتعيط علي عربية تروحك لغاية سرير بيتكوا.
عنوان صبحي كابر "مطعم الإخلاص والأمانة" : ٤ شارع فراج حميدة، روض الفرج.
This is dummy text. It is not meant to be read. Accordingly, it is difficult to figure out when to end it. But then, this is dummy text. It is not meant to be read. Period.
Conversion Conversion Emoticon Emoticon